په ننګرهار ولايت کې د دوو استنادي دېوالونو د رغونې کار د ۱۰ ميليونه افغانيو په لګښت بشپړ او ګټې اخيستنې ته و سپارل شول
د ټولګټو وزارت له لوري د ننګرهار ولايت په هسکه مېنه او کوټ ولسوالیو کې د دوو استنادي ديوالونو کار د څه باندې ۱۰ ميليونه افغانيو په ارزښت بشپړ او د ننګرهار ولايت د ټولګټو د رئیس محترم مولوي يار محمد محمدي، د يادو ولسواليو ولسوالانو او يو شمېر نورو سيمه اييزو مسوولینو په شتون کې ګټې اخیستنې ته وسپارل شول.
په يادو پروژو کې د هسکې مېنې ولسوالۍ د تور راغه په سیمه کې د ۲۵ متره په اوږدوالي او ۷ متره په لوړوالي سره د يو استنادي دېوال د رغونې کار د څه باندې درې ميلیونه افغانیو په ارزښت بشپړ شوی دی چې رغنیزې چارې یې شاو خوا د ۴۰ ورځو په موده کې بشپړې او ګټې اخيستنې ته وسپارل شو.
دغه راز دياد ولایت د کوټ ولسوالۍ په عطا خان سيمه کې هم د ننګرهار ولايت د حلقوي سړک د تخريب د لا مخنيوي په موخه د ۱۲۰ متره په اوږدوالي، ۷.۲ متره په لوړوالي او شاوخوا ۳ متره پلنوالي سره يو استنادي دېوال د څه باندې ۷ ميليونه افغانيو په ارزښت بشپړ شوی چې د رغونې کار یې د درې مياشتو په موده کې ترسره شو.
د يادونې وړده چې د يادو دېوالونو په رغونې سره به د دغو سړکونو د لا تخريب څخه مخنیوی وشي.
