ټولګټو وزیر له ایراني پلاوي سره پر ځينو پروژو بحث وکړ
ټولګټو وزیر انجنیر نجیب الله یمين په خپل کاري دفتر کې له یوه ایراني لوړ پوړي پلاوي سره وکتل او پر ځینو اړینو پروژو یې بحث وکړ.
په دې ناسته کې د ایران اسلامي جمهوريت د لارو او پټلۍ وزارت ځانګړي استازي سید حسین میرشفیع چې د یوه درې کسیز پلاوي مشري يې کوله، علاقه وښوده چې ایران هېواد د افغانستان پر ځینو لویو ټرانسپورټي زېربنايي پروژو پانګونې ته چمتو دي.
د ټولګټو وزیر ښاغلي نجيب الله يمين وويل د سیمه ییز اتصال لپاره ایران د افغانستان ارزښتناک کاونډی وباله او زياته يې کړه چې دواړه هیوادونه کولی شي چې یو بل ته د ترانزیټي زېربناوو په برخه کې د همکاریو لاس ورکړي.
په ياده ناسته کې دواړو لوريو د میلک ابرېشم پله، ابونصر فراهي سړک، دوغارون او اسلام کلا سړک پر رغونه او بیا رغونه بحث وکړ چې تر یوې هوکړې وروسته به پر یادو پروژو کار پیل شي.
ټولګټو- وزارت
د کب ۲۵مه، ۱۳۹۹
