د کابل - کندهار لویې لارې د ترمیماتي سروې چارې دوام لري
د ټولګټو وزارت د هبرۍ په لار ښوونه، د دې وزارت له بیلابیلو برخو څخه د ٣٢ تنو مسلکي انجنیرانو او افغان صداقت او باختر ګروپ ودانیزو شرکتونو لخوا د کابل - کندهار لویې لار د ترمیماتي سروې چارې دوام لري.
د کابل - کندهار لویه لار چې شاوخوا ٤٠٠ کیلومتره اوږدوالی لري؛ د ګڼو ولایتونو پر نښلون سربیره د هیواد یوه مهمه ټرانزیټي لویه لار ده، چې له بده مرغه په تیرو کلونو کې د لوړ تناژ باروړنکو موټرو د تگ - راتگ له کبله ویجاړه شوې ده.
د ټولګټو وزارت رهبري هڅه کوي چې درنو هیوادوالو ته د تګ - راتګ پرمهال د غوره ټرانسپورتي اسانتیاوو د رامنځته کولو او د سوداګریزو او کرنیزو توکو د خوندي او چټک لېږد په موخه د هیواد ټول سړکونه، لویې لارې، پُلونه او پُلچکونه چې وړاندې ویجاړ شوي دي ترمیم او بیاورغوي.
د یادونې وړ ده؛ چې د کابل - کندهار لویې لارې په اوږدو کې د دریو پایو پُلونو او د یادې لويې لارې ( قلات ښار - میدان ښار ) میلینګ کاري، د قلات ښار له مرکز څخه تر شینکۍ ولسوالۍ پورې د غځیدلي سړک داغ ګیري، د پُلګوټو ترمیم او د سړک غاړو سنګ کاري او همدارنګه د یوه پایه پُل په ګډون د سالنګ لویې لارې د ٣٠ کیلومتر سړک ترمیم او د کابل - میدان ښار د ٨ کیلومتره سړک ترمیمول هغه پروژې دي چې د ټولګټو وزارت له لوري له وړاندې قراداد شوي وې او اوس مهال د ځینو پروژو د ترمیم چارې بشپړې او د ځینو نورو د ترمیم کار په چټکۍ سره دوام لري.
د ټولګټو وزارت رسنیز دفتر
