د ټولګټو وزارت په نوښت په لومړي ځل د روڼتیا، حساب ورکونې او شفافیت په موخه د الکترونیکي (ډیجیټلایزیشن) سیسټم پرانستل شو.
د ټولګټو وزارت د نوي رهبرۍ په هڅو د لومړي ځل لپاره د تدارکاتي پړاونو د الکترونکي کېدو په موخه د قراردادي شرکتونو لپاره د ډیجیټلایزیشن سیسټم نن ورځ په رسمي ډول د ګڼو شرکتونو د مسؤلینو په شتون کې پرانیست.
په همدې موخه جوړې شوې غونډې کې د وزارت مقام تخنیکي مرستیال ډیپلوم انجنیر عبدالقیوم ځاځي، مالي او ادارې مرستیال ښاغلي محمد حامد محبي، د ساتنې او څارنې مرستیال پوهنیار پاینده محمد انوري، د وزارت رئیسانو او د بېلابېلو شرکتونو مسؤلینو ګډون درلود.
په پیل کې د ټولګټو وزارت تخنیکي مرستیال ښاغلي عبدالقیوم ځاځي وویل: د ټولګټو وزارت نوي رهبري هڅه کوي چې شرکتونو ته د انوایس د اجرا په برخه کې اسانتیاوې رامنځه کړي، هغه زیاته کړه مخکې انوایس په ځنډ اجرا کیدل چې د پروژې د کار د ځنډ سبب هم کیدو خو اوس دا ستونزه هواره شوه او له دې وروسته به په خپل وخت کار سرته رسېږي.
نوموړي همداراز د وزارت او قراردادي شرکتونو په همغږۍ ټینګار وکړ او د شرکتونو مسؤلینو ته یې د وزارت له ادرسه د قانون تر چتر لاندې د هر راز همکاریو ډاډ ورکړ.
نوموړي وویل، د ټولګټو وزارت رهبري او ټول کاري ټیم ژمن دی، څو پر وخت سره کارونه سرته ورسوي.
د وزارت مالي او ادارې مرستیال ښاغلي محمد حامد محبي د نوي پرانستل شوي سیسټم په اړه ګډون والو ته بشپړ معلومات ورکړل او وې وویل، دا نوی ډیجیټلي سیسټم د پروژو د غوره مدیریت، شرکتونو ته پر وخت د انوایسونو په اجرا، د تدارکاتي پړاونو په برخه کې د روڼتیا رامنځته کول او دغه راز معلوماتو ته د خلکو د لاس رسي په برخه کې ګټور رول لري.
هغه زیاته کړه په یاد سیسټم کې د شرکتونو له راجستر کیدو ورسته به د شرکتونو لپاره د انوایس د اجرا په برخه کې ګڼې اسانتیاوې رامنځته شي او نور به قراردادي شرکتونه اړ نه وي چې د انوایس د اجرا په موخه ادارو ته مراجعه وکړي.
وړاندې تردې ښاغلي محبي ډاډ څرګند کړ، چې دا سیسټم یوازې د شرکتونو لپاره نه بلکې په نورو ټولو برخو باندې به کار کوي، چې پیل یې د شرکتونو مسؤلینو ته د آسانتیاوو رامنځته کول وو.
د وزارت د مرستیال په وینا، تردې وروسته هر څوک کولای شي، چې خپلې شته ستونزې، غوښتنې او وړاندیزونه له مونږ سره شریک کړې، څو مونږ ورته ژر تر ژره د حل لاره چاره وګورو.
