د تورغونډۍ بندر د پراختيا او تأسیساتو د رغولو عملي چارې پیل شوې
د هرات ولايت اړوند د تورغونډۍ بندر د پراختيا او تأسیساتو د رغولو عملي چارې د ا.ا.ا او ترکمنستان هيواد د لوړپوړي پلاوي له لوري د يو لړ ځانګړو مراسمو په ترڅ کې رسماً پيل شوې.
د مراسمو په جریان کې، د ټولګټو وزارت د اوسپنې پټلۍ مرستيال محترم الحاج مولوي محمد اسحاق صاحبزاده وويل، چې د تورغونډۍ بندر د پراختیا پروژه په ۵۰ جریبه ځمکه کې پلې کېږي او په یاده پروژه به له 5 څخه تر ۷ میلیونه امریکایي ډالرو پورې لګښت راشي، چې د یوکال په موده کې به یې چارې بشپړې او ګټې اخیستنې ته وسپارل شي.
دغه راز د ټولګټو وزارت د اوسپنې پټلۍ مرستيال محترم الحاج مولوي محمد اسحاق صاحبزاده او د ترکمنستان هېواد د وزیرانو د کابیني د رئیس مرستیال او مل پلاوي ترمنځ د یاد بندر پر اهمیت، د شته ستونزو دحل، د انتقالاتو پرزیات والي او د تورغنډۍ – هرات بندر باندې د ترکمنستاني لوري د پانګونې په تړاو خبرې اترې وشوې.
د یادو مراسمو په لړ کې، د هرات والي محترم شیخ مولانا اسلام جار او د ترکمنستان هېواد راغلي پلاوي یاده پروژه مهمه و بلله او زیاته یې کړه، چې د تورغونډۍ بندر د پراختيايي پروژې په بشپړېدو سره به د هېواد په اقتصاد کې ستر مثبت بدلون رامنځته شي.
تورغونډۍ بندر په هرات ولايت کې د افغانستان او ترکمنستان ترمنځ پر پوله موقعیت لري او د منځنۍ آسیا او افغانستان ترمنځ د تجارتي توکو د لېږد-رالېږد يو له مهمو ترانزیټي مسيرونو څخه ګڼل کېږي.
