د جلال آباد - تورخم سړک د قیر اچونې چارې پیل او دا مهال عملاً جریان لري
د ا.ا.ا د ټولګټو وزارت له لوري د جلال آباد - تورخم لویې لارې دویم لین سړک د اساسي رغونې چارې له خصوصي سکتور سره قرارداد شوې وې، چې دا مهال يې کار عملاً جریان لري.
یاده پروژه ۷۳ کیلومتره اوږدوالی لري، چې د څه باندې ۸۴۸.۶ میلیونه افغانیو په ارزښت یې د پاتې برخو چارې له خصوصي سکتور سره قرارداد شوې دي، او ټاکل شوې ده، چې د ۲۲ میاشتو په موده کې به بشپړې او ګټې اخیستنې ته وسپارل شي.
د ننګرهار ولايت د ټولګټو ریاست رئیس محترم مولوي احمد احمدي د يادې پروژې د آسفالټ اچونې چارو د څرنګوالي او د کار له جریان څخه لیدنه او ارزونه ترسره کړه.
د جلال آباد - تورخم سړک دهېواد یو له مهمو مسيرونو څخه دې چې د کرنيزو محصولاتو او سوداګريزو توکو د لېږد رالېږد په برخه کې مهم رول لري.
د يادونې وړ ده، چې د یادې پروژې د آسفالټ اچونې د چارو په بشپړيدو سره به درنو هېوادوالو او سوداګرو لپاره د پام وړ اسانتياوې رامنځ ته شي.
