د سالنګونو لويه لار د ترافيکو پر مخ پرانيستل شوه
د سالنګونو لويه لار چې يکشنبه د شپې ۱۱:۵۵ د دوامداره واورې، طوفان او د ليدلو ساحې د کموالي له امله د ترافیکو د تګ راتګ پر مخ تړلې وه، نن چهارشنبه د سهار ۷ بجې د سالنګونو د ساتنې او څارنې رياست د شته پرسونل او ماشينرۍ له خوا د کوچنيو او لويو مسافر وړونکو وسايطو پرمخ پرانیستل شوه.
په سالنګونو کې د واورې ضخامت په بیلا بیلو سیمو کې متفاوت دی چې شاو خوا له يو متر څخه تر ۱۴۵ سانتي متره پورې رسیږي.
دا مهال د سالنګونو په بېلابېلو سيمو کې د واورې کمزوری اورښت جريان لري، د ټولګټو وزارت د سالنګونو د ساتنې او څارنې رياست کاري ټيمونه هڅه کوي چې ياده لويه لار په بشپړه توګه پاکه کړي.
ټولګټو وزارت له درنو هیوادوالو او موټر چلوونکو څخه د ځان او مال د لا خونديتوب په موخه هيله کوي چې د ژمني توکو او تجهيزاتو د درلودلو ترڅنګ دې؛ له پوره احتياط څخه کار واخلي او د سالنګ د مسوولینو لار ښوونو ته دې په ټینګه پاملرنه وکړي.
د يادونې وړ ده چې، په ځینو سیمو کې د واورې کمزوری اورښت جريان لري او د تېزې واورې او طوفان د بيا پيلېدو پر مهال به د سالنګونو لویه لار په وقفه يي ډول بیا و تړل شي.
