د ټولګټو وزارت د اوسپنيزې کرښې مرستيال په ترکيه کې له ميشتو افغان سوداګرو او پانګوالو سره وکتل
د ټولګټو وزارت د اوسپنيزې کرښې مرستيال محترم مولوي محمد اسحاق صاحب زاده د اوسپنې پټلۍ د نړيوالې اتحاديې (UIC) د ۳۴مې، سيمه ييزې غونډې په څنډه کې په ترکيه کې له يو شمېر ميشتو افغان سوداګرو او پانګوالو سره په داسې حال کې لیدنه وکړه، چې د ا.ا.ا د صنعت او سوداګرۍ وزارت سرپرست وزیر محترم نورالدين عزيزي هم شتون درلود.
د ياد وزارت د اوسپنيزې کرښې مرستيال محترم مولوي محمد اسحاق صاحبزاده په دغه ليدنه کې د افغانستان د اوسني وضعیت په اړه خبرې وکړې او ويې ويل، دامهال د ملي او نړيوالو سوداګرو لپاره د پانګونې بشپړه زمينه برابره ده او دوی کولای شي، چې افغانستان ته بېرته راوګرځي او پانګونه وکړي.
د اوسپنيزې کرښې مرستيال ملي سوداګر اقتصادي مجاهدین ياد کړل او زیاته یې کړه، د ا.ا.ا چمتو دی، چې له ملي سوداګرو سره هر ډول همکاري وکړي.
دغه راز د ټولګټو وزارت د اوسپنيزې کرښې مرستيال په ترکيه کې له ميشتو افغان سوداګرو سره د ليدنې ترڅنګ د ياد هيواد له سل کاله پخوانۍ اوسپنيزې کرښې، د دغه هیواد د اوسپنې پټلۍ له ملي موزيم، د استانبول ښار له ميټرو تمځایونو او د يادو تمځایونو له مديريتونو څخه هم ليدنه وکړه.
د يادونې وړ ده، چې له دې سفر څخه مخکې د ا.ا.ا د ټولګټو وزارت د اوسپنيزې کرښې مرستيال د افغانستان او ایران ترمنځ د دوه اړخيزو ريلي همکاريو د پراختيا په موخه ايران ته هم سفر کړی وو.
۱۱قوس د ټولګټو وزارت رسنیز دفتر
