د ټولګټو وزیر د کندهار - هلمند لویې لارې د ترمیم او بیارغونې او د ګرشک – موسی کلا سړک د رغونې پروژو له کاري بهیر څخه
د ا.ا.ا د ټولګټو وزیر، محترم الحاج ملا محمد عیسی ثاني، جنوب لوېدیځ زون ته د خپل کاري سفر پر مهال، چې یو شمېر رئیسانو او تخنیکي انجینیرانو یې ملتیا کوله، د کندهار - هلمند لویې لارې د اساسي ترمیم او بیارغونې او د ګرشک – موسی کلا سړک د رغونې پروژو له کاري بهیر څخه لیدنه وکړه.
د ټولګټو محترم وزیر د یادو پروژو انجینرانو، تخنیکي ټیمونو، د پروژې مسؤلینو او د څارنې ټیمونو ته لارښوونه وکړه، چې د دغو پروژو چارې په ټاکلي وخت او د انجینرۍ له معیارونو سره سمې بشپړې کړي.
د کندهار ـ هلمند لویې لارې دغه برخه د ۸۵ کیلومترو په اوږد والی سره د کندهار ولایت د باغ پل له سیمې څخه پیل او د هلمند ولایت تر دوهلارې سیمې پورې غځېږي. د یادې پروژې رغنیزې چارې په دوو لاټونو کې روانې دي، چې لومړی لاټ ۴۰ کیلومتره او دویم لاټ ۴۵ کیلومتره اوږدوالی لري.
د یادې پروژې د لومړي لاټ چارې ۷۵ سلنه او د دویم لاټ چارې ۶۹ سلنه بشپړې شوې دي او پاته چارې یې جریان لري.
همدارنګه، د هلمند - موسی کلا سړک ټولټال ۴۶.۵ کیلومتره اوږدوالی لري چې دا مهال یې د لومړي لاټ ۲۰ کیلومتره سړک او دویم لاټ ۲۶.۵ کیلومتره سړک رغنیزې چارې له بېلابېلو فزیکي پرمختګونو سره جریان لري او د یادې پروژې په اوږدو کې د ګڼ شمېر پلګوټو د رغونې کار هم شامل دی.
دا په داسې حال کې ده، چې د ټولګټو وزارت محترم وزیر د تیرې پنجشنبې ورځې راهیسې د جنوب لوېدېځ زون د دیو شمیر نورو پروژو له کاري بهیر څخه هم لیدنه او ارزونه کړې وه.
