د کونړ ــ نورستان د لومړي لاټ سړک رغنیزې چارې ۵۳ سلنه کاري پرمختګ لري
د کونړ ــ نورستان لومړی لاټ سړک چې څه باندې ۱۱ کیلومتره اوږدوالی او ۸ متره پلنوالی لري، دا مهال یې رغنیزې چارې له ۵۳ سلنه کاري پرمختګ سره دوام لري.
د سړک د دغې پروژې د رغیدلو تړون د ټولګټو وزارت له لورې له یوه خصوصي ودانیز شرکت سره تړون شوي، چې ټول مالي لګښت یې د افغانستان دولت له پراختیایي بودیجې څخه ورکول کېږي.
نورستان چې د هېواد درېیم ملي پارک دی، ورغځېدلي لویه لار یې د ټولګټو وزارت په څو پړاونو کې تر مرکز پارون پورې په اساسي ډول رغوي، چې دا مهال یې په دوو لاټو په ښه توګه کار جریان لري.
د یاد سړک په بشپړیدا سره به د نورستان خلک له ګڼو اسانتیاوو برخمن شي او هم به د کونړ، نورستان د اوسېدونکو او ګڼو نورو هېوادوالو د تګ راتګ په برخه کې شته ستونزې حل شي.
د یادونې وړ ده، چې د دې سړک دویم لاټ چې څه باندې ۱۰ کیلومتره اوږدوالی لري، په چټکۍ سره دوام لري.
