زابل: د کابل – کندهار لویې لارې د ۶.۹۸ کیلومتره سړک د ترمیم چارې بشپړي شوې
ټولګټو وزارت د زابل ولایت د شاجوی ولسوالۍ اړوند د کابل – کندهار لویه لار څه باندې ۶ کیلومتره سړک په اساسي ډول سره ترمیم کړل چې اوس مهال یې چارې بشپړې شوي دي.
د زابل ولایت اړوند د کابل – کندهار لویې لارې ۶.۹۸ کیلومتره سړک، چې د موټرو د ډیر بار له کبله لښتې پکې جوړ شوي وو او د نقلیه واسیطو تګ را تګ یې له خنډ او ځنډ سره مخ کړی وو، اوس مهال یې جر شوي ځایونه ډک او ترمیم شول او د خلکو ترانسپورتي ستونزې د پخوا په پرتله هوارې شوي دي.
د سړک د ترمیم دا پروژه د ټولګټو وزارت له خوا له یوه خصوصي ودانیز شرکت سره د څه باندې ۱۲ میلیون افغانیو په ارزښت تړون شوي و، چې مالي لګښت یې د افغانستان دولت له ملي بودیجې څخه ورکول شوي.
ټولګټو وزارت خلکو ته د ترانسپورتي اسانتیاو د رامنځته کولو په موخه پلان لري چې د کابل – کندهار لویه لار د یاد وزارت پراختیایي بودیجې ته په کتو په اساسي ډول سره ترمیم او بیاورغوي.
