د ټولګټو سرپرست وزیر میدان وردګو ولایت ته د کابل-کندهار لويې لارې پروژې د آرزونې په موخه سفر وکړ
د ټولګټو سرپرست وزیر محترم الحاج ملا محمد عیسی ثاني ددغه وزارت اړوند د یو شمیر رئیسانو په ملتیا میدان وردګو ولایت ته سفر وکړ او د شپې ناوخته يې د سيد آباد ولسوالۍ اړوند د شيخ آباد په سيمه کې د پروژې د کار له جریان څخه لیدنه وکړه.
نوموړي د میدان وردګو ولایت د شیخ اباد پُل په ساحه کې تخنيکي او کاري ټیم ته لارښوونه وکړه، دا چې خلک او مسافرين پر بديله لاره د ګڼو ستونزو سره مخ دي، نو په همدې اساس باید تخنيکي او کاري ټيم هڅه وکړي، چې د ټولګټو وزارت د خبرتيا له مخې دا برخه په دوو کاري ورځو کې بشپړه کړي.
ددې ترڅنګ د ټولګټو سرپرست وزیر د کابل-کندهار لويې لارې د کابل-غزني برخو څخه هم ليدنه وکړه او تخنیکي او کاري ټیمونو ته يې لازم هدایات ورکړل، ترڅو ددې برخې د بیارغونې چارې په چټکۍ او پر وخت تکمیل کړي.
د یادونې وړ ده، د کابل-کندهار لويه لاره د چټکي بيارغونې او بشپړېدو په موخه ګڼو ساختماني شرکتونو ته په قرارداد ورکړل شوې ده.
