د کندهار – هرات لویې لارې د دویم لین سړک د دویم او درېیم لاټونو د جوړولو پروژه له ۲۲ سلنه فزیکي پرمختګ سره جریان لري
د ا.ا.ا ټولګټو وزارت له لوري د کندهار – هرات لویې لارې دویم لین سړک ( باغ پل – ګرشک) د دویم او درېیم لاټ د جوړولو پروژه، چې ټولیز اوږدوالی یې ۵۲ کیلومتره، د سړک پلنوالی ۷.۳۰ متره او د دواړو غاړو شولډرونه یې ۶ متره دي، د ۱ میلیارد او ۸۷۳ میلیون او ۷۰۴ زره افغانیو په ټولیز لګښت جریان لري.
د دغې پروژې دویم لاټ د حوض مدد بازار له سیمې پیل او د میوند ولسوالۍ تر بازار (کشک نخود بازار) پورې غځېدلی، او درېیم لاټ یې د میوند ولسوالۍ له بازار څخه پیل او د هلمند تر دوه لارې پورې امتداد لري.
په دې پروژه کې د ۲ پایو پلونو، ۱۴۹ پایو پلچکونو، ۲ واشونو (معبرونو) او ۲ کیلومتره کانکریټي ویالو جوړول شامل دي. دا مهال د پروژې په بېلابېلو برخو کې د پلونو او پلچکونو، واشونو، کندن کارۍ او خاورې اچونې چارې روانې دي، چې تر اوسه د ۶۸ پایو پلګوټو د جوړولو چارې بشپړې شوې دي. د یادې پروژې چارې تر دې دمه ۲۲ سلنه فزیکي پرمختګ لري.
د کندهار – هرات لویه لار د هېواد له مهمو ترانزیټي لارو څخه شمېرل کېږي، چې د کندهار او هلمند ولایتونو د نښلولو ترڅنګ د هېواد سوېلي او سوېل لوېدیځو ولایتونو په نښلولو کې مهم رول لري او له همدې لارې د ابونصر فراهی، تورغونډۍ او اسلام کلا مهمو سوداګریزو بندرونو ته د تګ راتګ زمینه برابروي.
د دې پروژې په بشپړېدو سره به نه یوازې د هېواد دننه د سوداګرۍ د ودې او پراختیا زمینه برابره شي، بلکې له هېواد څخه بهر به د صادراتو او وارداتو په کچه کې هم د پام وړ زیاتوالی راشي.
