د کمپنۍ له پُله د میدان وردګو تر دُراني بازاره د دویم لین سړک رغنیز کار چټک شو
دا سړک چې ۲۴.۵ کیلومتره اوږدوالی او ۱۱.۳ متره پلنوالی لري، د کابل ښار د پنځمې ناحیې له کمپنۍ پُل څخه پېل او د میدان وردګو ولایت تر دُراني بازار پورې غځیږي، چې اوس مهال یې رغنیز کار ته چټکتیا ورکړل شوي.
د دې سړک په اوږدو کې دری پُلونه، ۶۰ پآیې پُلګوټي، ۱۳۱۰ متره مکعب استنادي دیوال او ۸.۶۱۸ کیلومتره لښتي هم شامل دي، چې تر دې مهاله یې رغنیز کار له ۲۰.۴ سلنه کاري پرمختګ سره دوام لري.
د یاد سړک رغنیز کار د څه باندې ۱.۳ میلیارده افغانیو په ارزښت د ټولګټو وزارت او یوه خصوصي ودانیز شرکت ترمنځ تړون شوی، چې مالي لګښت یې د هیواد له ملي بودیجې څخه ورکول کیږي.
دا پروژه د کابل ـ هرات لویې لارې د دویم لین سړک یوه برخه ده، چې ټولګټو وزارت یې په راتلونکې پلان کې تر کندهار ولایت پورې غځول په پام کې لري.
د یادونې وړ ده چې په دې پروژه کې د کمپنۍ دوه پلونه هم شامل دي چې هر یو یې ۵۶ کیلومتره اوږدوالی لري او اوس مهال د یوه پله رغنیز کار بشپړ شوی او ګټې اخیستنې ته چمتو دی؛ او پر بل یې کار دوام لري.
د ټولګټو وزارت رسنیز دفتر
