د ټولګټو وزارت سرپرست وزیر د افغاني او ترکي شرکتونو له رئیسانو سره د غورغوري – لښکرګاه او لښکرګاه – کندهار اوسپنیزې کرښې پروژې د تفصیلي ډیزاین په اړه وکتل
د ټولګټو وزارت سرپرست وزیر محترم الحاج ملا محمدعیسی ثاني د آریاخان افغان ساختماني او سرک جوړونې شرکت له رئیس محترم حاجي نعمت الله پوپل او د التس ترکي ساختماني او د اوسپنیزې کرښې انجنیري خدمتونو شرکت له رئیس محترم عمرچټین سره د غورغوري – لښکرګاه او لښکر ګاه – کندهار اوسپنیزې کرښې پروژې د تفصیلي ډیزاین په اړه په خپل کاري دفتر کې وکتل.
په یاده غونډه کې د ټولګټووزارت سرپرست وزیر د یاد وزارت د اوسپنیزې کرښې اړوند د هرات – کندهار اوسپنیزې کرښې تفصیلي پروژې په اړه خبرې وکړې او وزیاته یې کړه، چې دا مهال په هیواد کې تر بل هروخت امنیت ښه شوی او د ا.ا.ا کورنیو او بهرنیو شرکتونو ته د پروژو د پلې کولو بشپړه زمینه برابره کړې ده، یاد شرکتونه کولای شي چې د پروژو په داوطلبیو کې ګډون او په یاده برخه کې پانګوونه وکړي؛ نوموړي دغه راز په یاده برخه کې د هر ډول همکاریو ډاډ ورکړ.
په دغه ناسته کې د اریاخان خان افغان ساختماني او سړک جوړونې شرکت رئیس محترم نعمت الله پوپل چې د هرات – کندهار اوسپنیزې کرښې د څلورم او پنځم لاټ تطبیق کوونکی دی و ویل چې د یادې پروژې د تطبیق په برخه کې یو ترکي شرکت هم له دوی سره همکاري کوي.
دغه راز په یاده غونډه کې د التس ترکي ساختماني او د اوسپنیزې کرښې انجنیري خدمتونو شرکت رئیس محترم عمر چټین و ویل؛ چې موږ غواړو د اسلامي امارت او خلکو لپاره په یاده برخه کې خدمت وکړو او د هرات – کندهار اوسپنیزې کرښې د څلورم او پنځم لاټ پروژې په تطبیق کولو کې بشپړه همکاري کوو.
د هرات – کندهار اوسپنې پټلۍ مسیر د تفصیلي ډیزاین په موخه په څو بېلابېلو برخو وېشل شوی دی، چې آریاخان افغان ساختماني شرکت یې د دو برخو په داوطلبۍ کې بریالی اعلان شوی دی.
