د سمنګان ولایت په چشمه صیاد سیمه کې د استنادي دېوالونو د جوړولو چارې پیل شوې
د ټولګټو وزارت له لوري د سمنګان ولایت د خلم ولسوالۍ اړوند په چشمه صیاد سیمه کې د ۳۲۰ متره استنادي دېوالونو د جوړولو پروژه له خصوصي سکټور سره د ۱۶ میلیونه او ۱۳۷ زره افغانیو په ارزښت قرارداد شوې، چې د سمنګان ولایت د ټولګټو رئیس محترم مولوي مطیعالله عابد، د ولایت مقام استازي محترم مولوي جان محمد، د قراردادي شرکت مسئولینو او د سیمې د اوسېدونکو په شتون کې رسماً پرانیستل شوه او چارې یې پیل شوې.
په دغه پروژه کې د استنادي دېوالونو جوړول، د دېوالونو شاته برخې ډکول او د تخریب شویو برخو آسفالت پکې شامل دي. ټاکل شوې چې د پنځو میاشتو په موده کې به بشپړه او ګټې اخیستنې ته وسپارل شي.
د دې پروژې پلي کول د سړک د لا ډېر تخریب د مخنیوي، د طبیعي عواملو له امله د رامنځته کېدونکو زیانونو د مخنیوي او له دې مسیر څخه د هېوادوالو د اسانه او خوندي تګ راتګ په برخه کې مهم رول لري، همدارنګه د سوداګریزو توکو د لېږد او ترانسپورټي اسانتیاوو د زیاتوالي زمینه برابروي.
د ټولګټو وزارت د پراختیایي پروژو د پلي کولو ترڅنګ، د شته ترانسپورټي زیربناوو ساتنه، څارنه او ترمیم هم د خپلو کاري لومړیتوبونو څخه ګڼي او د دغو پروژو په پلي کولو سره د دې ملي شتمنیو د تخریب مخنیوی کوي.
