د بامیانو په ورس ولسوالۍ کې د یوه ۱۵ متره پُل رغنیز کار ۹۲ سلنه بشپړ شوی
دا کانګریټي پُل چې ۱۵ متره اوږدوالی او ۳۰۰ متره نښلونکی سړک لري، د بامیانو ولایت د ورس ولسوالۍ په قره غجور سیمه کې جوړېږي، چې تر دې مهاله یې رغنیز کار له ۹۲ سلنه کاري پرمختګ سره دوام لري.
د دې پروژې رغنیز کار د څه باندې ۱۰ میلیونه افغانیو په ارزښت، د ټولګټو وزارت لخوا له یوې سیمې ییزې شورا سره تړون شوی، چې مالي لګښت یې د هېواد له ملي بودیجې څخه ورکول کېږي.
د یادې پروژې د رغنیز کار له بشپړیدو سره به د ورس ولسوالۍ د قره جغور کلي په ګډون پل ته د نیږدې کلیو د اوسېدونکو لپاره د تګ راتګ په برخه کې د پخوا په پرتله ګڼې اسانتیاوې رامنځته کړي.
دغه راز به د دې پروژې د رغنیز کار په جریان کې د ورس ولسوالۍ اوسېدونکو ته په مستقیم او غیرمستقیم ډول ۷۳۰ کاري ورځې هم رامنځته شي.
