د ټولګټو وزارت د سړکونو د ساتنې او څارنې مرستیال د کابل – جلالآباد دویم لاین سړک له رغنیزو چارو څخه لیدنه وکړه
د ا.ا.ا د ټولګټو وزارت د سړکونو د ساتنې او څارنې مرستیال، محترم الحاج معاون ملا عبدالجبار، د هېواد ختیځو ولایتونو ته د سفر پر مهال د یو تخنیکي پلاوي په ملتیا د کابل – جلالآباد دویم لاین سړک او د ننګرهار ولایت د یو شمېر نورو پروژو له رغنیزو چارو څخه لیدنه او ارزونه وکړه.
نوموړي د دغه سفر په ترڅ کې، د کابل – جلالآباد دویم لاین سړک د رغنیزو چارو د ارزونې تر څنګ، د جلالآباد ښار د حلقوي سړک پر مسیر د کمبو معبر د تحکیماتي پروژې څخه هم لیدنه وکړه او اړوندو مسئولینو ته یې د کار د چټکتیا، غوره کیفیت او پر ټاکلي وخت د پروژو د بشپړېدو په اړه لازمې لارښوونې وکړې.
همدارنګه محترم حاجي معاون صاحب د یادې لیدنې پر مهال د ننګرهار ولایت د ټولګټو ریاست کړنې او فعالیتونه وستایل او د یاد ریاست اداري او مسلکي کارکوونکو ته یې د ا.ا.ا د نافذه قوانینو او مقرراتو په رڼا کې د چارو د لا ښه ترسره کېدو په اړه لازمې سپارښتنې او لارښوونې وکړې.
د یادونې وړ ده، چې د ټولګټو وزارت د سړکونو د ساتنې او څارنې مرستیال د هېواد ختیځ زون ته د سفر په لړ کې د لغمان، کنړ او نورستان ولایتونو کې هم د یو شمېر پراختیایي پروژو څخه لیدنې ترسره کړې دي.
