د ټولګټو وزارت د وزیر کړنې وستایل شوې
د ټولګټو وزارت د وزیر انجنیر نجیب الله یمین کړنې، له فساد سره د کلکې مبارزې، راغلیو وروستیو اصلاحاتو او پرمختګونو، د کاري ظرفیت د لوړاوي، هېواد ته د خدمت او ګڼو نورو لاسته راوړنو په پار په ولسي جرګه کې د هلمند د خلکو د استازي او د یادې جرګې د دفاعي چارو او ځمکنۍ بشپړتیا کمېسیون د مرستیال الحاج غلام ولي افغان لخوا د ستاینلیک په ورکولو سره وستایل شوې.
د هلمند د خلکو استازي وویل، د ستر ویاړ ځای دی، چې د افغانستان دروند ملت په کابینه کې خپل هېواد، خاورې او ولس ته ژمن شخصیتونه لري.
نوموړي د ټولګټو وزیر ته د لیدنې پر مهال په راتلونکي کې د لا زیاتو نورو بریالیتوبونو او پرمختګونو هیله هم څرګنده کړه.
په همدې حال کې د ټولګټو وزیر د هلمند د خلکو له استازي ښاغلي غلام ولي افغان څخه د مننې ترڅنګ وویل، زه د افغانستان جوړونې مشخص پلان لرم، د هېواد او هېوادوالو ستونزې مې درک کړې او په پوره پیاوړي هوډ، کلکې ارادې او قوي مورال سره به په راتلونکي کې لا نور هم د خپلو خلکو او وطن لپاره د زړه له تله لا زیات کار او خدمت کوم.
د ټولګټو وزارت رسنیز دفتر
