د ټولګټو وزارت وزیر د کونړ له استازي سره د پېج درې سړک د رغونې او یو شمېر پُلونو د بیارغونې په موخه وکتل
د ټولګټو وزارت محترم وزیر انجنیر نجیب الله یمین نن ورځ په خپل کاري دفتر کې په ولسي جرګه کې د کونړ له استازي استاد نعمت الله کریاب سره د هغه ولایت د ځینو سړکونو او پُلونو د رغونې او بیارغونې په اړه لیدنه وکړه.
د لیدنې په پیل کې د کونړ استازي ښاغلي کریاب د ټولګټو وزارت له وزیر څخه د دې په پار مننه وکړه، چې د نورو ولایاتو د آبادۍ ترڅنګ یې کونړ ته هم ځانګړې پاملرنه کړې او ورپسې یې د پېج درې د ۲۰ کیلومټره سړک د رغونې او همهاله یې د ناړۍ او دوکلام د پُلونو د بیارغونې غوښتنې وړاندې کړې.
د ټولګټو وزیر انجنیر نجیب الله یمین د کونړ استازي ته د پېج درې سړک د جوړیدا اودغه راز په یاد ولایت کې د شته پُلونو د بیارغونې په موخه له خپله اړخه د هر راز همکاریو ډاډ ورکړ.
د ټولګټو وزیر وویل، کونړ ولایت د هېواد یو له غرنیو ولایاتو څخه دی، چې د خپل ځانګړې غرني طبیعت او موقیعت په درلودلو سره باید ورته په اساسي ډول سړکونه ورغول شي.
نوموړي وړاندې تردې زیاته کړه: د پېج درې سړک رغیدو ته تربل هرڅه وړاندې ژمن یوو، یاد سړک مهم او ارزښت یې لوړ دی، دا ځکه چې کونړ د نورستان له واما ولسوالۍ سره نښلوي.
هغه زیاته کړه: داچې نورستان د هېواد درېیم ملي پارک نومول شوی، نو د دې سړک په جوړیدو سره به د خلکو ګڼې ټرانسپورټي ستونزې هوارې شي او ورسره سم به یادو ولایتونو ته د کورنیو او بهرنیو سیالانیانو ورتګ هم زیات شي، چې دا کار به د اقتصادي پیاوړتیا او فرهنګي ودې سبب وګرځي.
د ټولګټو وزارت مطبوعاتي څانګه
