ټولګټو وزارت د انرپ پروګرام له لارې ۱۷۵ پروژې تر کار لاندې لري.

د کلیو د لار جوړونې ملي پروګرام یا NRAP چې وړاندې د ټولګتو وزارت او کلیو د بیارغونې او پراختیا وزارت له خوا په ګډه پر مخ وړل کېده اوس مهال یوازې ټولګټو وزارت ته سپارل شوی دی چې ۱۷۵ تر کار لاندې پروژې لري.

د دې پروګرام له لارې په کلیوالي سیمو کې د لارو، پلونو او پلګټو رغونه او بیا رغونه تر سره کیږي چې د هیواد په ډېرو ولایتونو کې ګڼې تر کار لاندې، تدارکاتي او د سروې او ډیزاین په پړاوونو کې پروژې لري.

دغه راز د یاد پروګرام اصلي موخه په کمه موده کې په ټیټ قیمت د باکیفیته پروژو پلی کول دي، چې د ۱۴۰۰ مالي کال د تصویب شوي بودیجې د سند پر بنسټ د انرپ پروګرام د ټرانسپورټ په سکټور کې راغلی او د یوه واحد بودیجوي کوډ څخه د ټولګټو وزارت په اډانه کې چارې پر مخ وړي.

د یادونې وړ ده، چې دا پروګرام په کابل، پنجشیر، بدخشان، اروزګان، زابل، کندهار، هلمند، خوست، پکتیا، لغمان، ننگرهار، نورستان، بلخ، فاریاب،بغلان، تخار،هرات، پروان، کاپیسا، لوگر، میدان وردګ، بامیان، غور، کونړ او بادغیس ولایتونو کې ۲۳۷ بیلابیلې سفالټي، جغلي، او کانکریټي د سړکونو، پلونو، پلچکونو او استنادي دیوالونو پروژې لري.

وړاندې تر دې ټولګټو وزارت د سړکونو سیمه ییزې، ملي او ولایتي پروژې درلودې خو اوس مهال د انرپ پروګرام له لارې په کلیوالي سیمو کې هم ګڼې پروژې پر مخ وړي.

ټولګټو وزارت ــ کابل

د وري ۱۰ مه، ۱۴۰۰