په بدخشان ولایت کې د ٢٦ کیلومتره سړک رغنیزې چارې د ٦٠٣ میلیونه افغانیو په ارزښت پیل شوې دي
د ا.ا.ا د ټولګټو وزارت له لوري د بدخشان ولایت د اوسېدونکو د ترانسپورتي ستونزو د حل په موخه په یاد ولایت کې د ٢٦ کیلومتره سړک رغنیزې چارې د ٦٠٣ میلیونه افغانیو په ارزښت پیل شوې دي.
یاد سړک ٢٦ کیلومتره اوږدوالی او ١٠ متره پلنوالی لري، چې د بدخشان ولایت د یفتل، یاوان، راغستان او کوهستان ولسوالۍ له مرکز فیض آباد ښار سره نښلوي.
د دغې پروژې په تطبیق سره د سیمې اوسېدونکي خوښ دي او وایي چې په بشپړېدو سره به یې د اړوندو ولسواليو د اوسېدونکو د تګ راتګ ستونزې په بشپړه توګه هوارې شي.
