په بغلان ولایت کې د نهرین – جلګې سړک د لومړي لاټ د رغونې چارې د ۱۹۲ میلیونه افغانیو په ارزښت پیل شوې
د ا.ا.ا د ټولګټو وزارت له لوري په بغلان ولایت کې د نهرین - جلګې عمومي سړک د لومړي لاټ د اساسي رغونې چارې د یاد ولایت د ټولګتو رئیس مولوي عبدالنصیر شیخ زاده او یو شمېر سیمه ییزو مسؤلینو په شتون کې پیل شوې.
د یاد سړک لومړی لاټ چې ۱۲ کیلومتره اوږد والی لري د اساسي رغونې چارې یې د ټولګټو وزارت او خصوصي سکتور ترمنځ د ۱۹۲ میلیونه افغانیو په ارزښت قرارداد شوې دي، چې د ۱۸ میاشتو په موده کې به یې رغنیزې چارې بشپړې شي.
د دغې پروژې په تطبیق د سیمې خلک خوښي څرګندوي او وایې، چې د دا ډول پروژو پلې کیدل د هېواد د پرمختګ لپاره اړین دي.
د یاد سړک د کار په جریان کې به یو شمېر هېواد والو ته د کار زمینه برابره شي او په بشپړېدو سره به یې د درنو هېواد والو په ځانګړي ډول د یاد مسیر څخه د تلوونکو مسافرو د تګ راتګ، د کرنیزو او سوداګریزوتوکو د انتقال ستونزې د پخوا په پرتله هوارې شي.
ټولګټو وزارت تل هڅه کوي، چې د لویو لارو، سړکونو، پلونو، پلګوټو او اوسپنیزې کرښې په ترمیم، رغونې او بیا رغونې سره درنو هېوادوالو، موټر چلوونکو او سوداګروته بشپړې آسانتیاوې رامنځ ته کړي.
