په کنړ ولايت کې د زيړي بابا او پشد پل د ترميم او بیا رغونې چارې پيل او دا مهال عملاً جریان لري
د ټولګټو وزارت سرپرست وزیر محترم ملا محمد عیسی ثاني کنړ ولايت د خپل وروستي سفر په ترڅ کې د ياد ولايت د اوسيدونکو ستونزو ته پام کې نيولو سره د زيړي بابا او پشد پلونو د ترمیم تدارکاتي او تخنیکي چارې اړونده انجنیرانو ته سپارلې وې چې د بودجې له منظوریدو وروسته یې د ترميم او بیا رغونې پيل او دا مهال عملاً جریان لري.
د زيړي بابا پل چې د ياد ولايت په سرکاڼو ولسوالۍ کې موقعیت لري، ترميماتي چارې يې د متحد صافي شرکت سره د شاوخوا ۴۷ ميليونه افغانيو په ارزښت پيل شوي او د يو کال په موده کې به يې کار بشپړ شي او د پشد پل، چې د نرنګ او سرکاڼو ولسوالیو ترمنځ موقعيت لري د ترميم او بیا رغونې چارې يې د امان صافي ساختماني شرکت سره د شاوخوا ۱۶ ميليونه افغانيو په ارزښت قرارداد شوي دي چې کار به يې د شپږو میاشتو په موده کې بشپړ او ګټې اخيستنې ته وسپارل شي.
د يادو پلونو په رغولو سره به د کنړ ولايت د خاصکنړ، نورګل، نرنګ او د سرکاڼو ولسوالیو د اوسېدونکو د تګ راتګ ستونزې د پخواه په پرتله هوارې شي.
د ټولګټو وزارت رسنيز دفتر
