د ټولگټو چارو وزارت له لوري د کندهار ـ کابل لویې لارې دوه لوی تخریب سوي پُلونه جوړ او گټي اخیستنې ته وسپارل سول
د زابل په مربوطاتو کې د کابل ـ کندهار پر لویه لار دوه لوی تخریب سوي پُلونه د ټولگټو چارو وزارت له لوري جوړ او نن سه شنبه رسماً د ټولگټو چارو وزارت د مرستیال ملا بخت الرحمن شرافت له لوري گټې اخیستنې ته وسپارل سول، چې پرمهال یې د کندهار د ټولگټو چارو د رئیس مولوي نعمت الله سراجي ترڅنگ د زابل د ټولگټو چارو رئیس او یوشمېر نورو مسئولینو هم حضور درلود.
د یادو پُلونو د گټي اخیستنې په مراسمو کې د ټولگټو چارو وزارت مرستیال ملا بخت الرحمن شرافت وویل:
د زابل په مربوطاتو کې د کندهار ـ کابل لویې لارې ددې تخریب سویو پُلونو پر جوړېدو پنځه میلیونه افغانۍ لگښت راغلی، چې د یاد وزارت لخوا ورکول سوې.
د ټولگټو چارو وزارت مرستیال په خپلو خبرو کې وویل:
دوی ته د کندهار ـ کابل لویه لاره لومړیتوب لري او هڅه یې داده، چې ټول تخریب سوي ځایونه یې ورغوي.
