د سالنګونو لویه لار د ترافیکو پر مخ پرانيستل شوه
د سالنګونو لویه لار چې تېره شپه ۹:۱۰ د تیزې واورې د اورښت دوامداره طوفان او د لیدلو ساحې د کمښت له امله د ترافیکو پر مخ تړل شوې وه، د سالنګونو لویې لارې د ساتنې او څارنې ریاست د شته پرسونل او ماشینرۍ په دوامداره هڅو نن سهار لس بجې له شمال څخه جنوب لوري ته د کوچنیو مسافر وړونکو وسایطو پرمخ پرانیستل شوه او د ورځې په جریان کې به وسایطو ته له جنوب څخه شمال لوري ته هم د تګ اجازه ورکړل شي.
دامهال په سالنګونو کې د واورې اورښت درېدلی او تر اوسه پورې طوفان جریان لري، د واورې ضخامت په بېلابېلو سيمو کې توپير لري، چې له ۶ سانتي مترو څخه تر ۲۵ سانتي مترو پورې رسیږي او د سالنګونو د ساتنې او څارنی ریاست کارکوونکي په واورينو سیمو کې د خاورې او مالګې په شیندلو بوخت دي.
ټولگټو وزارت له درنو هېوادوالو او موټرچلوونکو څخه د دوی د خونديتوب لپاره غوښتنه کوي، چې د يادې لویې لارې څخه په تېرېدو پررمهال دي د وسایطو لپاره چین (ځنځیر) ګرم ژمني توکي او تجهیزات له ځان سره ولري، ترافیکي قوانین مراعت، له بشپړ احتیاط څخه کار واخلي او د سالنګونو د موظفینو لارښوونو ته جدي پاملرنه وکړي.
