بغلان: د قندو فابریکې سیمه کې جوړېدونکی پل ۷۰ سلنه کاري پرمختګ لري
دا اوسپنیز کانکریټي پل چې ۶۸ متره اوږدوالی او یو کیلومتر نښلونکی جغلي سړک لري، د بغلان ولایت د مرکزي بغلان ولسوالۍ د قند فابریکې سیمې په کندهاریانو کلي کې جوړیږي، چې اوس مهال یې رغنیز کار له ۷۰ سلنه پرمختګ سره دوام لري.
د یاد کانکریټي پُل رغنیز کار د ټولګټو وزارت له لوري له یوه خصوصي ودانیز شرکت سره د څه باندې ۳۹ میلیون افغانیو په ارزښت تړون شوی چې مالي لګښت یې د هیواد له پراختیایي بودیجې څخه ورکول کیږي.
پر دې پله د کار پر مهال د سیمې اوسېدونکو ته په مستقیم ډول ۶۸۸۰ کاري ورځې رامنځته شوي او د چارو له بشپړیدو سره به یې د کندهاریانو، صاحب زاده او یو شمېر نورو کلیو اوسېدونکو ته د تګ راتګ اسانتیاوې رامنځته شي.
د دې تر څنګ به یاد پل ډېر کلي او د بغلان د قندو فابریکه د بغلان – کندوز له عمومي سړک سره ونښلوي چې د فابریکې د تولیداتو په زیاتوالي او چټک لیږد کې به مثبت رول ولري.
