د تخار – کندز لویې لارې د ترمیم او بیا رغونې کار د څه باندې ۱۵ میلونه افغانیو په ارزښت بشپړ او کټې اخیستنې ته وسپارل شو
د تخار – کندز لویې لارې د ترمیم او داغګیري کار چې د څه باندې ۱۵ میلونه افغانیو په ارزښت د ټولګټو وزارت او دوراني سړک جوړونې او ودانیز شرکت ترمنځ قرار داد شوی وو بشپړ او د تخار ولايت د ټولګټو رياست د رئیس او یو شمېر سيمه ايزو مسؤولینو په شتون کې ګټې اخیستنې ته وسپارل شو.
په ياده پروژه کې د ۳۲ متره استنادي دېوال، یوه پایه پُلګوټي، ۵۴۶ متره وسپنيز کانکریټي لښتي رغول او دغه راز پر لوی پُل د ۲۸۹ متره په اوږد والي او ۸ متره پلنوالي سره، د اسفالټ اچونې کار هم شامل وو، چې دامهال يې چارې بشپړې او ګټې اخيستنې ته وسپارل شو.
د یادونې وړ ده؛ چې د یادې پروژې د کار په جریان کې د سيمې یو شمېر اوسیدونکو ته د کار زمینه برابره شوې وه او په بشپړیدو سره یې د تخار – کندز پر مسیر د تلونکو مسافرو ترانسپورتي ستونزې را کمې شوې دي.
