د سالنګونو لویې لارې د پرانیستلو په هکله د ټولګټو وزارت خبرتیا!
د ا.ا.ا ټولګټو وزارت د سالنګونو لویې لارې اړوند د سږکال پلان شوی کار بشپړ کړی دی؛ په همدې اساس د یادې لویې لارې د تیرې خبرتیا په دوام، اصلي مسیر به د (۱۴۴۶هـ.ق. کال د جمادی الآخر په ۲۲مه، چې د ۱۴۰۳ ه.ش. کال د جدي له ۴مې نېټې سره سمون لري) د لویو، کوچنیو مسافر وړونکو او بار وړونکو وسایطو پرمخ پرانیستل کیږي.
د یاونې وړ ده چې لویو او کوچنیو مسافر وړونکو وسایطو ته له دواړو خواوو او بار وړونکو وسایطو ته به په نوبتي ډول يوه ورځ له شمال څخه جنوب لورې ته او بله ورځ له جنوب څخه شمال لورې ته د تګ اجازه ورکول کېږي، چې د سه شنبې په ورځ د جدي میاشتې په ۴ نیټه به، بار وړونکي وسایط له شمال څخه جنوب لوري ته د تګ اجازه ولري.
ټولګټو وزارت له ټولو درنو هېوادوالو او موټر چلوونکو څخه په ډير درنښت هيله کوي، چې په ياده لویه لاره د سفر پرمهال دې د وسایطو لپاره ځنځیر (چين)، گرمې جامې، ژمنې توکې او د اړتیا وړ خوراکي توکي له ځان سره ولري، ترافيکي قوانین دي مراعت کړي او له بي ځايه سبقت څخه دي په کلکه ډډه وکړي.
