د سړکونو د ساتنې او څارنې معین د سوداگرۍ او پانگونې خونې له مرستیال سره ولیدل:
د ټولگټو وزارت د سړکونو د ساتنې او څارنې معین الحاج ملا عبدالجبار معاون د افغانستان د سوداگرۍ او پانگونې خونې له مرستیال الحاج خیرالدین مایل او یو شمیر سوداگرو سره ولیدل.
په دې لیدنه کې دواړو لورو د لوړ تناژ بار وړونکو لیږدونکو وسایطو د وزن او اړخونو دکنټرول د مقررې په تطبیق، د هیواد بندرونو ته د سوداګریزو توکو په لیږد رالیږد، د وسایطو په معیاري کولو او سوداگرو ته د ترانسپورتي اسانتیاوو د رامنځته کولو په موخه خبرې وکړې.
د ټولگټو وزارت د سړکونو د ساتنې او څارنې معین په دې لیدنه کې وویل: سړکونه چې ملي سرمایه ده په لوړه بیه رغول شوې دي او د افغانستان په خلکو پورې تړاو لري، چې د ا.ا.ا، په راتلو سره په هیواد کې ډاډمن امنیت تأمین شوی دی او په تلو کې هیڅ ډول اضافي پیسې له سوداگرو څخه نه اخیستل کېږي.
هغه همدارنگه وویل: موږ هڅه کوو، چې ویجاړ سړکونه ترمیم او بیا ورغوو او بل لورې ته د سړکونو له تخریب څخه د مخنیوي په موخه مو د هیواد په بیلابیلو برخو کې تلي نصب کړي دې؛ تر څو د وسایطو وزن کنترول او معیاري شي، دغه راز په دې ناسته کې د دواړو لورو د همغږۍ او همکاري په رامنځته کولو ټینگار وکړ.
