د قیصار – لامان سړک د پنځم لاټ رغنیزې چارې جریان لري
د قیصار – لامان سړک د افغانستان د حلقوی سړک یوه برخه ده، چې د ا.ا.ا ټولګټو وزارت یې د ۲۵ کیلومترو په اوږد والي سره د پنځم سکشن رغنیزې چارې پیل کړې دي او دامهال جریان لري.
یاد سړک ۱۲ متره پلنوالی لري، چې ۷ متره یې اسفالټ او د سړک دواړو خواوو ته دوه نیم دوه نیم متره شولډرونه لري، خو د ښارونو په منځ کې د سړک سور آن تر ۲۰ مترو پورې رسیږي، چې ۸ متره یې د پیاده رو لپاره او پاتې ۱۲ متره یې د وسایطو د تګ راتګ لپاره ځانګړی شوی دی.
د یاد سړک په اوږدو کې یو شمېر مصنوعي ساختمانونه، سټرکچرونه، د درې پایې لوی پلونه د ۶۰، ۹۰ او ۱۸۰ مترو په اوږد والي سره، ۶۸ پایې پلګوټي، ۲۷۰ متره استنادي دېوالونه، د سړک دواړو خواوو ته ۱۲۲۰ متره د سړک غاړې ویالې او کانکریټي پیاده رو او د سړک یوې غاړې ته ۴۰۰ متره کانکریټي ویالې او پیاده رو رغول کیږي چې دا مهال یې رغنیزې چارې مخ پروړاندې روانې دي.
د قیصار – لامان سړک، د هېواد دحلقوي سړک یوه برخه او له مهمو سړکونو څخه شمیرل کیږې، چې د کار په جریان کې د سیمې یو شمېر اوسېدونوکو ته د کار زمینه برابره شوې ده او له رغېدو سره به یې درنو سوداګرو او هېواد والو ته د تګ راتګ او کرنیزو محصولاتو د انتقال په برخه کې د پام وړ آسانتیاوې رامنځته شي.
