د هرات ولایت اړوند د ارملک – لامان عمومي مسیر د پاتې ۱۱ کیلومتره سړک رغنیزې چارې جریان لري
د هرات ولایت اړوند د ارملک – لامان عمومي مسیر د پاتې ۱۱ کیلومتره سړک رغنیزې چارې د هرات او بادغیس ولایتونو ترمنځ د سبزک کوتل په سیمه کې جریان لري.
د ارملک – لامان عمومي مسیر، چې د هېواد د حلقوي سړک یوه برخه ده، د ۵۲ کیلومترو په اوږد والي سره د هرات ولایت د کرخ ولسوالۍ له ارملک سیمۍ څخه پیل او د بادغیس ولایت تر لامان سیمې پورې رسیږي، چې د ۴۱ کیلومتره سړک رغنیزې چارې یې د تیرې ادارې پرمهال بشپړې شوې وې او دا مهال یې د پاتې ۱۱ کیلومتره سړک رغنیزې چارې په چټکۍ سره جریان لري.
دغه پروژه د ټولګټو وزارت او سندریلا ودانیز او سړک جوړونې شرکت ترمنځ قرارداد شوې ده، چې تر راتلونکو دوو میاشتو پورې به یې چارې بشپړې او ګټې اخیستنې ته وسپارل شۍ.
د يادونې وړ ده، چې د يادې پروژې د کار په جریان کې د سیمې یو شمېر اوسیدونکو ته د کار زمینه برابره شوې ده او په بشپړېدو سره به یې درنو هېواد والو ته د تګ راتګ او د کرنیزو او سوداګریزو توکو د انتقال په برخه کې ګڼې اسانتیاوې رامنځته شي.
