د هرات – چشت شريف سړک د قير اچونې چارې په چټکۍ سره روانې دي
د هرات – چشت شریف لومړی لاټ سړک چې ۳۵ کیلومتره اوږدوالی او د سړک د یو یو متر غاړو په درلودلو سره ۱۲.۳۰ متره پلنوالی لري، په اوږدو کې یې ۲۹۴۰ متره لښتي او ۶۰۰ متره مکعب استنادي دیوالونه هم په اساسي ډول سره جوړيږي. چې په ورځني ډول له ۵۰۰ نه تر ۸۰۰ متره پوري د قير اچونې چارې تر سره کيږي.
د سړک دا پروژه ، د ټولګټو وزارت له لوري له یوه خصوصي ودانیز شرکت سره تړون شوي، چې ټول مالي لګښت یې د هیواد له ملي بودیجې څخه ورکول کیږي.
د هرات – چشت شریف سړک د ختیځ - لویدیځ ترانسپورتي دهلېز یوه مهمه برخه ده، چې هرات ولایت د کرخ، گذره، پشتون زرغون، اوبه او چشت شریف ولسوالیو له لارې له غور ولایت سره نښلوي او د چارو له بشپړېدو سره به یې د دې حیاتي دهلیز یوه مهمه برخه بشپړه شي.
د هرات – چشت شریف سړک، د دې برخې له جوړیدو سره به د هرات ولایت د چشت شریف ولسوالۍ د اوسېدونکو ګڼې ترانسپورتي ستونزې هوارې شي، د هرات د ختیځو ولسوالیو د هر اړخیز پرمختګ سبب به وګرځې او همدارنګه به د چشت شریف ولسوالۍ د مرمر ډبرو په لیږد کې اغېزمن تمام شي.
د یادوني وړ ده، چې د هرات - چشت شریف سړک ټولټال ۱۵۵ کیلومتره اوږدوالی لري او په پنځو برخو ویشل شوی چې لومړی لاټ یې ۳۵ کیلومتره او پاته څلور لاټونه یې هر یو ۳۰ کیلومتره اوږدوالی لري.
