د ټولګټو وزارت استازي د "سولې او باور" په نړيوال کنفرانس کې ګډون وکړ

 د ا.ا.ا د ټولګټو وزارت په استازيتوب د هرات د ټولګټو رئيس محترم ملا محمد ادريس، د ترکمنستان په پلازمېنه عشق آباد کې د "سولې او باور" تر عنوان لاندې په نړيوال کنفرانس کې ګډون وکړ.
د هرات د ټولګټو رئيس محترم ملا محمد ادريس، په دغه کنفرانس کې د وينا پرمهال ريل پټلۍ په نړۍ کې یو له مهمو ترانسپورتي زیربناوو څخه وګڼل ، چې په سيمه ايزه او نړيواله اقتصادي پراختیا، سوداګرۍ او نړیوالو اړیکو کې مهم رول لوبوي.
نوموړي وويل: «د ا.ا.ا رهبري او ټولګټو وزارت تل هڅه کوي، چې په افغانستان کې د ريل پټلۍ شبکه پراخه کړي، ترڅو د افغانستان د ريل پټلۍ شبکې له لارې سيمه ايز هیوادونه په ځانګړي ډول ترکمنستان، اوزبيکستان، ايران او پاکستان سره ونښلوي.»
د ياد کنفرانس مهمې اجنډاوې سیمه ایزه اقتصادي پیاوړتیا، د ریل پټلۍ شبکې پراختيا، برېښنا، د ګازو انتقال او د اقتصادي ثبات په تړاو هراړخیز مذاکرات ښودل شوي دي.
د يادونې وړ ده، چې په دغه کنفرانس کې د نړۍ د ۱۰۰ بېلابېلو هيوادونو استازي ګډون درلود، چې د افغانستان له لورې د برېښنا شرکت، کانونو او پترولیم وزارت او ټولګټو وزارت استازو ګډون کړی وو.