د ټولګټو وزارت د اوسپنیزې کرښې مرستيال د حيرتان بندر له ترميماتي چارو ليدنه او ارزونه وکړه
د ا.ا.ا د ټولګټو وزارت د اوسپنیزې کرښې مرستيال محترم مولوي محمد اسحاق صاحبزاده او مل پلاوي بلخ ولایت ته د سفر په ترڅ کې د حيرتان بندر اړوند له ريلي تمځايونو او د ياد بندر د ترميماتي چارو د کار له جريان څخه ليدنه او ارزونه وکړه.
ښاغلي صاحبزاده د حيرتان بندر اړوند له نايب اباد، مزارشریف او پنځم پورټ ريلي تمځايونو او د تخليې او بارګيرۍ پروسې د فعاليتونو د ارزونې ترڅنګ ځايي مسوولينو ته د تخليې او بارګيرۍ د پروسې، د اسنادو د طی مراحلو د سرعت او انتقالاتو د زياتوالي په تړاو لازم هدايات ورکړل، ترڅو ددغه مسير له لارې د انتقالاتو د ظرفيت کچه لوړه شي.
نوموړي د حيرتان بندر اړوند د ترميماتي چارو بشپړېدو ته د نږدې کېدو په تړاو خوښي وښوده او ډاډ يې څرګند کړ، چې په نږدې راتلونکې کې به د ياد تمځای ترميماتي چارې بشپړې او ګټې اخيستنې ته به وسپارل شي او په بشپړېدو سره به د حيرتان بندر له لارې سوداګریز انتقالات تر پنځم پورټ پورې، چې د مزارشریف هوايي ډګر ته څېرمه واقع دی؛ راورسيږي.
دامهال د سوداګريزو ريلي انتقالاتو لوړه کچه د حيرتان اوسپنيزې کرښې له لارې ترسره کيږي، چې صادرات، واردات او ټرانزيټ پکې شامل دي.
