د ټولګټو وزارت محترم وزیر د تورغونډۍ بندر د اوسپنې پټلۍ تمځای له پراختیا او نویو جوړېدونکو تأسیساتو له کاري بهیر څخه لیدنه وکړه
د ا.ا.ا د ټولګټو وزیر محترم الحاج ملا محمد عیسی ثاني، د یاد وزارت د تخنیکي پلاوي په ملتیا، هرات ولایت ته د خپل کاري سفر پر مهال د تورغونډۍ بندر د اوسپنې پټلۍ تمځای له پراختیا او نویو جوړېدونکو تأسیساتو له کاري بهیر څخه لیدنه او ارزونه وکړه.
نوموړي د یاد سفر په ترڅ کې د ترکمنستاني لوري د « دیمیریول ګورلوشیک» دولتي شرکت له رئیس، محترم سردار قربانوف، سره چې د یادې پروژې چارې پر مخ وړي هم وکتل او په دغه لیدنه کې د یادې پروژې د پرمختګونو، شته ستونزو د حل او تخنیکي مشخصاتو په اړه خبرې وشوې. د ټولګټو وزارت محترم وزیر ټینګار وکړ چې یاده پروژه دې د لاسلیک شوي تفاهملیک له مخې بشپړه شي.
په دې لیدنه کې د « دیمیریول ګورلوشیک» شرکت رئیس هم ډاډ ورکړ چې د یادې پروژې چارې به په ټاکلي وخت، د غوره کیفیت او تخنیکي مشخصاتو مطابق بشپړې کړي.
تورغونډۍ بندر په هرات ولايت کې د افغانستان او ترکمنستان ترمنځ پر پوله موقعیت لري او د منځنۍ آسیا او افغانستان ترمنځ د تجارتي توکو د لېږد-رالېږد يو له مهمو ترانزیټي مسيرونو څخه ګڼل کېږي.
