د ټولګټو وزیر د تخار له والي سره د ماوراي کوکچه سړک او ګڼو نورو پروژو په اړه لیدنه وکړه
د ټولګټو وزیر د تخار له والي سره د ماوراي کوکچه سړک او ګڼو نورو پروژو په اړه لیدنه وکړه
د کب ۲۴مه، ۱۳۹۹
د ټولګټو وزیر انجنیر نجیب الله یمین د خپل کار په دفتر کې د تخار له والي عبدالله قرلق سره وکتل.
په دې لیدنه کې د ټولګټو وزارت د سړکونو د ساتنې او څارنې مرستیال پوهنیار پاینده محمد انوري او په ولسي جرګه کې د تخار د خلکو استازي ډاکټر سیداشرف الدین هم ګډون درلود.
په لیدنه کې د تخار والي عبدالله قرلق سره له دې چې د ماوراي کوکچه سړک د کاري چټکتیا غوښتنه وکړه تر څنګ یې د تخار ــــ بدخشان او تالقانو ښار څخه تر چان او رستاق ولسوالیو پورې د سړکونو د رغونې او بیارغونې غوښتنه هم وکړه.
د ټولګټو وزیر انجنیر نجیب الله یمین د والي غوښتنو ته مثبت ځواب ووایه او زیاته یې کړه چې ماورای کوکچه پروژه په شمال ختیځه حوزه کې له اقتصادي اړخه خورا ډېره ارزښتناکه ده او کار ته به یې جدي پام وشي.
ماورای کوکچه سړک د شمال ختیځ دهلیز له مهمو برخو څخه ګڼل کېږي چې د آی خانم بندر د خواجه غار، دشت کلا، خواجه بهاوالدین، ینګي کلا او چاه آب ولسوالیو له لارې د تخار ولایت له مرکز تالقانو ښار سره نښلوي.
د ټولګټو ښاغلي وزیر همدا راز د ملي او کړییزو سړکونو رغونه له خپلو کاري لومړیتوبونو څخه وګڼله او د اکثرو پروژو له کاري کیفیت او چټکتیا څخه یې ډاډ ورکړ.
د ټولګټو وزارت ـــ کابل
