د ټولگټو وزارت سرپرست له هلمند ولایت څخه لیدنه وکړه
د ټولگټو وزارت سرپرست محترم الحاج ملا عبدالمنان عمري، له جنوب لوېدیځو ولایتونو څخه د لیدنې پرمهال، پرون ورځ هلمند ولایت ته سفر وکړ.
د ټولگټو وزارت سرپرست په دغه سفر کې د هلمند ولایت د گرشک – چاه انجیر سړک څخه، چې دا مهال یې رغنیز کار بشپړ شوی دی، او د لښکرگاه - کندهار دوه لارې پورې سړک او پر دغه مسیر له شته پلونو او پلگوټو څخه له نږدې لیدنه وکړه.
همدارنگه، د ټولگټو وزارت سرپرست په دغه سفر کې د هلمند ولایت د ټولگټو ریاست له مسؤولینو سره ولیدل او د یاد ولایت اړوند سړکونو، پلونو او پلگوټو د ساتنې او څارنې، ترمیم او بیارغونې په برخو کې ورته لازمې لارښوونې وکړې، چې له دې سره به له یوې خوا شته ترانسپورتي زیربینا خوندې پاته شي او له بل لوري به د هلمند ولایت اوسيدونکو ته غوره ترانسپورتي اسانتیاوې رامنځته شي.
د ټولگټو وزارت رسنیز دفتر
