د ټولگټو وزارت یو شمیر تخنیکي رئیسانو د کابل – کندهار له لویې لارې څخه لیدنه وکړه
د ټولگټو وزارت د رهبرۍ په لارښوونه د دې وزارت یوه تخنیکي ټیم د کابل – کندهار لویې لارې (له کابل څخه د میدان وردگو ولایت تر دراني بازار پورې) د اساسي ترمیم او بیارغونې په موخه له نږدې لیدنه او ارزونه وکړه.
یاد تخنیکي ټیم به د کابل – کندهار لویې لارې د اساسي ترمیم او بیارغوني لپاره د مناسبي تگلارې د رامنځته کولو، د مصارفو پرتله کول او د راتلونکي پلان په پام کې نیولو سره هر اړخیز راپور د وزارت مقام ته وړاندې کړي.
د یادونې وړ ده، د کابل – کندهار لویه لار چې په تیرو کلونو کې د بیلابیلو عواملو له کبله ویجاړه شوې ده، د ا.ا.ا، له بریا ورسته د دې وزارت له لوري یې ډیری ویجاړې شوې برخې ترمیم او میلینگ کاري شوې.
دا مهال ټولگټو وزارت پلان لري، تر څو دا لویه لار په اساسي ډول ترمیم او بیاورغوي چې عملي چارې به یې د راتلونکي کال په لومړيو کې پیل شي.
د کابل - کندهار لاره د هېواد یو له مهمو لویو لارو څخه شمېرل کیږي، چې پلازمېنه کابل له سویلي او لوېدیځو ولایتونو سره نښلوي او د سوداګریزو توکو (صادراتو او وارداتو) په لیږد رالیږد کې له ځانگړي اقتصادي ارزښت څخه برخمنه ده.
