د پکتیکا ولایت د ټولګټو ریاست د اداري ودانۍ رغنیزې چارې د څه باندې ۱۳.۷ میلیونه افغانیو په ارزښت بشپړې او ګټې اخیستنې ته وسپارل شوې
د پکتیکا ولایت د ټولګټو ریاست د اداري ودانۍ د جوړولو پروژه د ۱۳ میلیونه او ۷۲۱ زره افغانیو په ارزښت د ا.ا.ا د ټولګټو وزارت له لوري بشپړه او د پکتیکا ولایت د والي محترم مولوي عبدالخالق عابد، د والي مرستیال محترم قاضي نورالله حقاني، د یاد ولایت د ټولګټو رئیس محترم مولوي محمد اکبر عادل، علماوو او مخورو په شتون کې په رسمي ډول افتتاح او ګټې اخیستنې ته وسپارل شوه.
د دغې ودانۍ د جوړولو قرارداد د ټولګټو وزارت او یوه خصوصي ساختماني شرکت ترمنځ شوی و. په دغه پروژه کې د ۱۸ خونو د رغونې چارې شاملې وې، چې په دوو پوړونو کې یې ۱۴ اداري خونې او نورې خونې په جلا توګه رغول شوې دي.
ديادونې وړ ده، چې له دې وړاندې د پکتيکا ولايت د ټولګټو ریاست اداري تعمير نه درلود او په کرايي ودانيو کې یې رسمي چارې پرمخ وړلې، چې ډېری وخت به د کار کوونکو ترڅنګ مراجعين هم له ستونزو سره مخ وو.
د دغې ودانۍ په جوړولو سره به نه يواځې دا چې د یاد ریاست د کار کوونکو لپاره اسانتياوې رامنځته شي؛ بلکې د مراجعينو ستونزې به هم تر ډېره حل او اداري چارې به ګړندۍ شي.
