د کندز ولايت د دشت ارچي ولسوالۍ سړک د رغونې چارې ۴۹۸.۶ ميليونه افغانیو په ارزښت پيل شوې
د کندز ولايت د دشت ارچي ولسوالۍ سړک چې ځینې برخې پخوا بشپړې شوې وې، د سړک د پاتې برخې کار د ياد ولایت ټولګټو ریاست محترم رئیس ملا عبد الخالق حقمل، یو شمېر سیمه ییزو مسؤلانو، دینې علماوو، مجاهدینو او قومي مخورو په شتون کې پیل شو.
دغه سړک چې شاوخوا ۱۹ کيلومتره اوږدوالی لري، د رغونې چارې يې د ۴۹۸،۶۵۴،۹۱۲ افغانيو په ارزښت د دورانی سړک جوړونې او لوژیستکي شرکت سره قرارداد شوې دې چې، د ۱۸ مياشتو په موده کې به يې کار بشپړ شي.
د دغې پروژې په عملي کیدو سره به د تخار ولایت اته ګونه ولسوالۍ (کوکچې ته څیرمه) د کندز ولایت سره او له کندز ولایت څخه په تیریدو بلخ، سمنګان، بغلان او کابل ولایتونو سره وصل کیږي.
د ياد سړک په بشپړيدو سره به د تخار ولایت د مرکزي ولسوالیو په ګډون د دشت ارچي ولسوالۍ د اوسیدونکو ستونزې دپخوا په پرتله هوارې شي او د کرنيزو توکو په چټک انتقال کې به د پام وړ آسانتياوې رامنځته شي.
