ټولګټو وزير د کندهار له والي او استازو سره وکتل
د ټولګټو وزير انجنیر نجيب الله يمين په خپل کاري دفتر کې د کندهار له والي روح الله خانزاده او د دې ولايت له استازو سره د کابل- کندهار لويي لارې، کندهار حلقوي سړک او ګڼو نورو پروژو پر سر خبري وکړې.
ښاغلي يمين د هغوی د غوښتنو په ځواب کې وويل؛ د کابل- کندهار د لويې لارې د سروې تخنيکي کارونه عملا پيل شوي چې تر ډیزاين او تدارکاتي پړاونو وروسته به يې رغنيز کار هم پيل شي.
د ټولګټو وزیر ښاغلي نجیب الله یمين همدا شان زیاته کړه چې د کندهار حلقوي سړک رغنيز کار به هم له پلان سره سم پر ټاکلي وخت پیل شي.
روح الله خانزاده ژمنه وکړه چې په کندهار کې به د ټولګټو ریاست اړونده استهلاک شوې ماشینري د يوې ګډې هوکړې له مخې بیرته ترميم کړي چې د سړکونو په ساتنه او څارنه کې ترې ګټه واخستل شي.
