پروان: په بګرام کې د باریک آب پُل د تحکیم کاری کار د څه کم ۳ میلیونه افغانیو په ارزښت بشپړ او ګټې اخیستنې ته وسپارل شو
د ټولګټو وزارت لخوا؛ د پروان ولايت په بګرام ولسوالۍ کې د باریکاب پل د تحیکم کاري چارې بشپړي او نن د یو لړ مراسمو په ترڅ کې د یو شمېر ولایتي مسؤولینو په شتون کې ګټې اخیستنې ته وسپارل شو.
دغه پل ۳۵ متره اوږدوالی او ۳۴ متره پلنوالی لري، چې د سیلابونو اله امله ویجاړ شوی و او د تحکیم چارې یې د ټولګټو وزارت لخوا له یوه خصوصي ساختماني شرکت سره قرارداد شوي وې، چې لګښت یې د دغه وزارت له بودیجې څخه ورکړل شوی.
په همدې موخه جوړو شویو مراسمو کې د ټولګټو وزارت د ترانسپورت رئیس مولوي عبدالولي محمد د پروژې په هکله هر اړخیز معلومات وړاندي کړل، د یاد ولایت ټولګټو چارو رئیس مولوي عزت الله عارف د خبرو پرمهال د ژمي په موسم کې د واورې پاکولو تر څنګ د مټک – غوربند او د جبل السراج سړک د ترمیم او بیا رغونې یادونه وکړه او زیاته یې کړه چې په راتلونکي کې د نورو پروژو د تطبیق پلان هم لري.
دغه رازد باریک آب ولسوالۍ ولسوال د خلکو په استازيتوب خبري وکړې او د ټولګتو وزارت څخه یې د مننې ترڅنګ د نورو پروژو د پلې کیدو غوښته وکړه.
د باریکاب پُل، د کابل – شمال پر مسیر موقعیت لري، چې لوړتناژ باروړونکي موټر پرې تګ راتګ کوي او دورستیو اورښتونو او سیلابونو له امله تخریب شوی و.
د یاد پل په ترمیم او بیارغونې د سیمې خلک خوښ دي او له ټولګټو وزارت څخه د نورو پروژو د تطبیق غوښتنه کوي.
