په دایکندې ولایت کې د نیلي – آب چکې د شاوخوا ۱۹ کیلومتره سړک د ترمیم او پراخولو چارې د شاوخوا ۴۵.۵ میلیونه افغانیو په ارزښت پیل شوې
به دایکندې ولایت کې د دایکندې – کندهار سړک اړوند د نیلي – آب چکې سړک د ترمیم او پراخولو چارې نن د دایکندي ولایت د مرستیال والي محترم الحاج مولوي احسان الله رحمت یار، د یاد ولایت د ټولګټو رئیس محترم الحاج مولوي اکرام الله عبد الرافیع، د ځینو سیمه ییزو مسؤلینو، مجاهدینو او د سیمې د یو شمیر مخورو په شتون کې پیل شوې.
دغه سړک شاوخوا ۱۹ کیلومتره اوږدوالی لري، چې د دایکندي ولایت د مرکز نیلي اړوند له کهنه دې سیمې څخه د ياد ولایت د پاتو ولسوالۍ تر آب چکې سیمې پورې رسیږي او په اوږدو کې یې د ۳۲ پایو پلګوټو د بیارغونې او ترمیم کارونه هم شامل دي.
یاده پروژه د ټولګټو وزارت لخوا د ۴۵.۵میلیونه افغانیو په ارزښت له خصوصي سکتور سره قرارداد شوې ده، چې د څلورو میاشتو په موده کې به یې کار بشپړ او ګټې اخیستنې ته به وسپارل شي.
د یادونې وړ ده، چې د یادې پروژې د چارو په بشپړیدو سره به د خلکو ټرانسپورتي ستونزې د پخوا په پرتله هوارې شي.
