په پنجشیر ولایت کې د ۶.۳ میلیونه افغانیو په ارزښت د دوو پایو پلونو د ترمیم او بیا رغونې چارې بشپړې شوې
د ا.ا.ا د ټولګټو وزارت لخوا د پنجشیر ولایت د رخه ولسوالۍ د قابضان او د پریان ولسوالۍ د مرغابي دان پلونو د ترمیم او بیا رغونې چارې د ۶.۳ میلیونه افغانیو په ارزښت بشپړې او ګټې اخیستنې ته وسپارل شول.
د قابضان او مرغابي دان پلونو اساسي برخې د موسمي سېلابونو له کبله ویجاړې شوې وې او د رخې او پریان ولسوالیو اوسېدونکې یې د تګ را تګ پر وخت له ستونزو سره مخ کړي وو، چې د ترمیم او بیارغونې د کار له بشپړېدو سره یې د یادو ولسوالیو اوسېدونکو ستونزې د پخوا پرتله هوارې شوې دي.
د قابضان او مرغابي دان پلونه د اړوندو ولسوالیو له اساسي او مهمو پلونو څخه دي، چې د اقتصادي او ټولنیزو فعالیتونو او روغتیایي خدمتونو په وړاندې کولو کې مهم رول لري.
د یادونې وړ ده، چې د ا.ا.ا د ټولګتو وزارت در نو هېوادوالو، مسافرینو، موټرچلونکو او ملي سوداګرو ته د آسانتیاوو د برابرولو په موخه د هېواد په بېلا بېلو برخو کې د ګڼ شمېر لویو او کوچنیو پروژو چارې پیل کړې دي.
