په کاپیسا ولایت کې د سېلابونو راوتلو له امله د نجراب، تګاب او اله سای ولسوالیو مسیر د تخریب شويو برخو د ترمیم چارې پيلیږي
د پرون ورځې د اورښتونو او سېلابونو راوتلو له امله په کاپیسا ولایت کې د نجراب، تګاب او اله سای ولسوالیو سړک او استنادي دېوالونه تخریب شوي وو، چې یاد مسیر د لنډمهال لپاره د ترافیکو پرمخ تړل شوی و او د یاد ولایت د ټولګټو ریاست له لوري بېرته پرانیستل شو.
د دغو اورښتونو او سېلابونو راوتلو له امله د سړک ځینې برخې او شاوخوا ۱۲۰ متره استنادي دېوالونه تخریب شوي دي، چې د رغولو په موخه یې د ټولګټو وزارت وزیر محترم الحاج ملا محمدعیسی ثاني د یاد ولایت د ټولګټو ریاست رئیس او کاري پرسونل ته سپارښتنې کړې دي چې د یاد مسیر سړک او استنادي دېوالونه ژرتر ژره بېرته ورغوي، تر څو د ځايي خلکو د تګ راتګ ستونزې د پخوا په څیر هوارې شي.
