په کاپیسا کې د څه باندې ۱۱ کیلومتره کانکریټي سړک د جوړولو چارې پیل شوې
ټولګټو وزارت په کاپیسا ولایت کې څه باندې ۱۱ کیلومټره سړک او ۴ پایي پُلګوټي د ۸۹ میلیونه افغانیو په ارزښت په پاخه او اساسي ډول رغوي. چې د رغیدا تړون یې د ټولګټو وزارت او ۱۰ پراختایي شوراګانو ترمنځ لاس لیک شوی او اوس مهال یې رغنیزې چارې پیل شوي دي.
د دې سړک جوړېدل د کاپیسا ولایت د اوسېدونکو اساسي غوښتنه وه، ټولګټو وزارت د دوی اړتیا درک کړه او د سړک پر یادې پروژې یې کار پیل کړ. چې د کار په جریان کې به د سیمې اوسېدونکو ته ۶۶۳۰۵ کاري ورځې هم رامنځته شي او د کار له بشپړېدو سره به ۴۵۶۰۰ تنه په مستقیم او غیر مستقیم ډول ترې ګټه واخلي.
د یاد سړک له جوړیدو سره به قول بابر، خميردان، گدو چشمه، چشمه تلخ، ده بلبل، نو آباد، چهاراهی منگل او ملك محمد شيرين کلي د کاپیسا ولایت له مرکز محمود راقي سره ونښلول شي. او همدارنګه به د دې سړک پرمټ روغتیایي او ښوونیزو مرکزونو ته د خلکو لاس رسی تر پخوا اسانه شي اودغه راز به سوداګریزو مرکزونو ته د کرنیزو او حیواني محصولاتو په لېږد کې د پام وړ رول ولري.
