د غزني په جاغوري ولسوالۍ کې د یوه پایه پُل رغنیز کار دوام لري
دا اوسپنیز کانکریټي پُل چې ۱۰ متره اوږدوالی او ۲۹۰ متره نښلونکی سړک لري، د غزني ولایت د جاغوري ولسوالۍ د کوت خانه پایین سیمې په المتو کلي کې جوړیږي، چې تر دې مهاله یې رغنیزو چارو ۱۰ سلنه پرمختګ کړی.
یاده پروژه د څه باندې ۷ میلیون افغانیو په ارزښت د ټولګټو وزارت او یوې سیمه اییزې شوری تر منځ تړون شوی چې مالي لګښت یې د هیواد له ملي بودیجې څخه ورکول کیږي.
د دې پروژې د رغنیز کار له بشپړیدو سره به د جاغوري ولسوالۍ د الموت کلي د اوسېدونکو د تګ راتګ ستونزې تر پخوا کمي شي. همدارنګه د دې پروژې د رغنیز کار په جریان کې د غزني ولایت جاغوري ولسوالۍ اوسېدونکو ته په مستقیم او غیر مستقیم ډول ۵۲۸۱ کاري ورځې رامنځته شي.
د ټولګټو وزارت رسنیز دفتر
