د کابل په ده سبز ولسوالۍ کې د ۵.۸ کیلومتره سړک رغنیزې چارې په چټکۍ سره دوام لري
دا سفالټ یا پوخ سړک چې ۵.۸ کیلومتره اوږدوالی لري، د کابل ولایت د ده سبز ولسوالۍ له خواجه چاشت دوه لارې څخه پیل او د الله ګل مجاهد تر مدرسې پورې غځیدلی، چې تر دې مهاله یې رغنیز کار ۳۰ سلنه مخته تللی
د یادې پروژې د جوړیدا تړون د څه باندې ۸۳ میلیونه افغانیو په ارزښت د ټولګټو وزارت او یوه خصوصي ودانیز شرکت تر منځ شوی، چې مالي لګښت یې د هېواد له ملي بودیجې څخه ورکول کېږي
د دې پروژې د رغنیز کار له بشپړیدو سره به د ده سبز ولسوالۍ د اوسېدونکو ټرانسپورټي ستونزې تر پخوا کمي او د تګ راتګ په برخه کې به یې ګڼې اسانتیاوي رامنځته شي، همدارنګه به د دې پروژې د رغنیز کار له بشپړیدو سره د ده سبز ولسوالۍ اوسېدونکو ته په مستقیم او غیر مستقیم ډول ۱۴۲۰ کاري ورځې هم رامنځته شي
