لغمان: په قرغیو ولسوالۍ کې د کابل پر سیند د یوه ۱۰۰ متره کانګریټي پُل چارې پیل شوې
دا کانکریټي پُل چې ۱۰۰ متره اوږدوالی او د دوو لینونو په اندازه پلنوالی لري، د ټولګټو وزارت لخوا د لغمان ولایت په قرغیو ولسوالۍ کې د کابل پر سیند، چې د الینګار او علیشنګ سیندونه هم ورسره یو ځای شوي دي جوړیږي.
د دې مهم پله د جوړېدو تړون د ټولګټو وزارت لخوا له یو خصوصي ودانیز شرکت سره لاس لیک شوی، چې د رغنیز کار پر مهال به یې د سیمې ګڼو خلکو ته کاري هم زمینه برابره شي.
دا سل متره پل چې د کرغیو ولسوالۍ په عزیز خان کڅ کې جوړیږي، د لغمان ولایت مرکز مهترلام ښار به، د یوه لنډ مسیر له لارې د کابل - جلال آباد له عمومي سړک سره ونښلوي چې له کبله به یې د خلکو د تګ راتګ ستونزې هوارې شي.
